Во здравствените домови, болници, општини, училишта…, во повеќе градови во Македонија, како што јавуваат граѓан(к)и и граѓански новинари, се врши интензивна мобилизација не само на државната администрација, туку и на сите буџетари, за митингот на ВМРО-ДПМНЕ закажан во недела во Скопје.
„Се прават списоци во училишта, се ангажираат наставници и професори, им се наложува задолжително да присуствуваат на митингот во недела“, вели граѓанка од мало гратче во Источна Македонија, која инсистира на својата анонимност, исплашена за својата безбедност и работна иднина.
Од друг град од внатрешноста, пак, јавуваат граѓански новинари, се прават списоци на вработени во образованието и во Општината.
„Ќе се потпишуваат на список при влез во автобус, а потоа, кога ќе стигнат во салата’Борис Трајковски’, на списокот ќе треба да стават потпис, како потврда за нивното присуство. Кажано им е дека не смеат да отсуствуваат. На луѓето, иако се партиски членови, веќе им е здодеано да се јавуваат на сите митинзи, па наместо доброволно, од нив да се бара задолжително присуство“, вели граѓанскиот новинар, соработник на ЦИВИЛ Медиа.
Од друг град, на југозападот на државата, доаѓа реакција на граѓанка.
„Отидов на преглед во болница, и наместо да направат целосно ехо на стомак, докторот, вознемирен поради престојните активности, го скрати прегледот и ми рече дека во следната прилика, ќе ми обрне повеќе внимание“, се жали наташата соговорничка.
Од еден од поголемите македонски градови, доаѓаат реакции, дека масовно се вршат подготовки за митингот во недела.
„Па, на ништо друго не мислат, само тоа зборуваат. Особено оние нововработените, на коишто им се ветуваат решенија на неопределено… Тоа што им кажуваат на состаноци, тие го пренесуваат на работни места, собрани во групи во ходниците, додека излегуваат на пауза“, вели нашата соговорничка.
Партиските притисоци макар и врз членови на својата партија, требаше да бидат минато, особено со Договорот од Пржино. Сите реформи кои ги договорија политичарите, треба да значат стопирање на досегашната практика на примена на политички мобинг врз вработените.
Но, еве, и во пресрет на овие предвремени парламентарни избори, како впрочем, и за неколкуте изминати изборни циклуси, доаѓаат исти реакции и забелешки од граѓаните, адресирани до владејачката ВМРО-ДПМНЕ.
ЦИВИЛ Медиа
