ЦИВИЛ Медиа во Гостивар разговараше со Мухамед Точи, долгогодишен активист на граѓанското општество, лидер на ХДЗР „Месечина“, гостиварска организација која се залага за унапредување на правата на ромската заедница, којашто е стигматизирана и соочена со голем број предизвици и проблеми. Со него разговаравме за клучните проблеми на ромската заедница.
„Ромската етничка заедница е најранливата етничка заедница во Македонија чии основни приоритети ние ги застапуваме, а тие се – образование, вдомување, вработување и здравство“, вели Точи.
За решавање на сите горливи проблеми со кои се соочува, како ромската заедница, така и сите заедници во Гостивар, Точи вели дека најнапред државата треба да застане на нозе и веднаш потоа, како на локално, така и на национално ниво, државата да започне да ги перципира Ромите, нивните потреби и предизвиците со кои се соочуваат.
„Еднаш засекогаш, мора да се разбере дека решавањето на овие проблеми нема да може да се решат ако Ромите не бидат дел од креирањето и имплементацијата на политиките за Ромите“, вели Точи.
Тој вели дека политиките кои ги спроведуваат министерствата на локално и на национално ниво, најчесто не успеваат само затоа што не се вклучени самите Роми во креирањето на истите. За впечатокот во јавноста дека вклучувањето на ромскиот граѓански сектор е прилично формално, Точи вели дека и тоа може да се промени, единствено ако вистински се вклучат Ромите во процесот на креирање и имплементација на ваквите политики.
„Останува волјата на локалната и на националната власт, навистина сериозно да отпочне со имплементација на сопствените политики. Државата треба сама да одбере дали сака да ги реши овие проблеми или проблемите да се влечат и понатаму“, вели Точи.
Петрит Сарачини
Камера: Дехран Муратов
[divide]
Интервјуто е дел од проектот „Општество без граници“, што ЦИВИЛ – Центар за слобода го спроведува со поддршка од германската Фондација „Хајнрих Бел“. Цел на проектот е промовирање и едукација на граѓанките и граѓаните на Македонија за „Граѓанската повелба“, глобален документ за унапредување на граѓанските права и на активното учество на граѓаните во процесите на одлучување.
