Од Министерството за животна средина и просторно планирање порачуваат дека се подготвени да соработуваат со сите релевантни институции за да ги заштитат вредностите на природното наследство во земјава, јавува МИА.
„Политиките за заштита на природата или заштитените подрачја, во согласност со законодавството на ЕУ, се целта на нашата институција“, велат од министерството.
Заштитените области, додаваат, имаат културни, историски, археолошки вредности на културното наследство, на кои им се дава статус одреден со закон за нивна заштита и развој.
„Кањонот Матка има статус на природен споменик, а сепак за зачувување на тој статус бара посебно внимание и соработка помеѓу сите надлежни институции вклучувајки ја и Владата на РСМ. Во тек сме на подготовка на Студија за преиспитување на природните вредности на кањонот Матка. Покрај тоа, Министерството за животна средина и просторно планирање има за цел да го унапреди управувањето со заштитените подрачја во РСМ, како Шар Планина, Осоговските Планини, Тиквешкото Подрачје и др“, потенцираат од МЖСПП.
