ЦИВИЛ упатува најостра осуда на вчерашните објави на Миленко Неделковски со експлицитен говор на омразата на социјалните мрежи на сметка на информацијата дека пратеникот Мухамед Зеќири и неговото семејство се позитивни на Ковид-19. Деструктивноста на пораките на Неделковски се гледа и во бројните коментари во кои дел од неговите следбеници искажуваат поддршка на говорот на омразата, радост и ситење.
Миленко Неделковски е одамна познат по изјавите со повици на насилство против неистомислениците на режимот, со говор на омразата и пораки што претставуваат ширење на национална, верска и расна омраза.
Овој пат, Неделковски на својот Фејсбук профил со радост ја повтори веста, со желба за фатални последици по животот на Зеќири и на неговото семејство!
ЦИВИЛ најостро го осудува овој експлицитен говор на омразата, што непречено го шири Неделковски, криејќи се зад правото на слобода на изразувањето!
Креаторите на содржини и пораки, поттикнувачите, дистрибутерите и поддржувачите на говорот на омразата ги поминаа сите граници! Оваа состојба во јавноста веќе не може да се толерира и да поминува неказнето.
ЦИВИЛ бара од надлежните институции како што е МВР и Јавното обвинителство итно да постапат соодветно на законските обврски за да ја спречат и санкционираат оваа појава која сѐ повеќе зема замав. Понатаму, ЦИВИЛ ја повикува јавноста, сите свесни и совесни граѓанки и граѓани, да го отфрлат и осудат говорот на омразата и повиците за насилство во медиумите, социјалните мрежи и во јавните настапи.
Говорот на омразата поттикнува и дела од омраза. Во оваа состојба на загрозување на човековото здравје и фаталните последици од пандемијата, солидарноста ни е потребна повеќе од сѐ!
ЦИВИЛ ги повикува граѓанките и граѓаните да се придружат кон напорите за откривање, архивирање и обелоденување на говорот на омразата, лажните вести, корупцијата или кршењето на човековите права. Пријавите може да се поднесуваат на овој ЛИНК или на мејл [email protected], со назнака Граѓанска пријава.
https://clp.mk/prijava/
This post is also available in: Albanian
