Фотографијата на која, наставничката, Жанета Петровска, вработена во подрачното основно училиште „Кирил и Методи“ во с. Логоварди-Битолско, носи погребен крст за Зоран Заев,синоќа, кога ВМРО-ДПМНЕ славеше изборна победа, предизвика револт кај корисниците на социјалните мрежи. Граѓани, родители од разни професии го осудуваат ваквото непримерно однесување на наставничката,која најверојатно е партиски кадар или во најмала рака страстен симпатизер на ВМРО-ДПМНЕ.
Петровска не успеавме да ја контактираме, мобилниот телефон и на нејзиниот сопруг, Стефче Петровски, кој што е директор на ОУ „Тодор Ангелевски“ во Битола, беше недостапен. Директорката на централното училиште „Кирил и Методиј“ во Битола, Кристина Полизовска одби да го коментира случајот за ЦИВИЛ.
„Одбивам да коментирам зашто вие новинарите, изјавите ги вадите од контекст, затоа ќе исклучам. Пријатно“, рече во телефонскиот разговор Полизовска. Нашите убедувања, дека нејзината изјава целосно, ќе биде пренесена како аудио запис, не беа доволни, за да дојдеме во сознание, дали Полизовска како директор, смета дека треба да преземе соодветни мерки, макар наставничката да ја повика на дисциплинска одговорност.
Не успеавме да ја контактираме ниту советничката за образование во Општина Битола, Снежана Петровска. Постојаното префрлање од централата од еден на друг број, завршуваше со исклучување на телефонските линии.
Од подрачниот Инспекторат за образование изјавуваат дека немаат надлежност врз приватното однесување на наставниот кадар.
„Мое лично мислење е дека наставничката се однесувала крајно несериозно, и тоа не е во ред. Но, уличното однесување на наставниот кадар не е во надлежност на Државниот просветен инсекторат. Според Законот за основно образование ние го следиме однесувањето на наставниците во работно време и на работно место. Сепак вие како граѓани имате право да составите приговор за однесувањето на наставничката и да го доставите до училиштето, каде што таа работи“,изјави Весна Корлевска, раководител на Државниот просветен инспекторат од Битола.
Одговор дали воопшто и какви мерки ќе бидат преземени против наставничката -крстоносец од Битола, побаравме и од министерот за образование, Пиштар Лутфиу. Но, тој не одговори ниту на повикот, ниту на СМС пораката, ниту пак на електронската порака.
Според правните експерти, нема законски санкции за вакво недолично однесување на кадрите, надвор од работно време.
„Но, секако директорот на училиштето треба да ја повика на дисциплинска одговорност,бидејќи станува збор навистина за морбиден случај. Од друга страна, засегнатата личност, во случајот лидерот на опозицијата Зоран Заев, може да ја тужи за навреда“, изјави Сандра Гавриловска, правен експерт на ЦИВИЛ-Центар за слобода.
Според, психолозите, наставниците како полујавни личности, треба да знаат дека, дел од нивниот приватен живот е достапен на една поголема група луѓе, меѓу кои и многу деца, чие формирање на личноста не е завршено.
„Тоа значи дека, какво било однесување на наставник, кој за децата е неприкосновен авторитет, може да предизвика воспитување во погрешен правец, којшто не се одрзува само врз самата единка-детето, туку се реперкуира и врз општеството, а најмногу врз личноста која повлекува погрешни потези. Затоа што ако сакаме да воспитуваме деца, треба првин себе си да се се воспитаме. Нашиот пример го следат децата и нашето однесување, а не она што ние зборуваме или го кажуваме. Децата се одлични критичари на однесувањето и на возрасните. Не се наивни како што мислиме,туку се напротив одлични критичари на погрешно однесување. Нивниот начин на препознавање е во стилот на „црно-бело“,тие одлично знаат да препознаат две работи: што е добро, а што е лошо. Во конкретниотв случај, сметам дека се работи за лице со лошо чувство за хумор, и дека надлежните органи, не треба да ја казнат, туку треба да и купат комплет карти за филмовите од фестивалот „Браќа Манаки“, за да може дотичната особа културно да се издигне“, велат психолози за ЦИВИЛ.
Според психијатарот, д-р Сашо Пирганоски, сцената на фотографијата е морбидна, манифестира ниски страсти на личноста која можеби ја понеле емоции,афект…
„Но,треба да се остане интелектуалец. Големината на личноста е да можеш да ги контролираш тие емоции и треба да ги контролираш, зашто си човек. Од друга страна ако се има предвид фактот, дека личноста е дел во образовниот и педагошки процес, сметам дека надлежните треба веднаш да ја повикаат на одговорност. И секако треба да се има праг на морална сензитивност во вршење на одредени професии, треба да се врши претходна проценка на личностите, кои се избираат да ги работат. Особено во овој случај, кога станува збор за воспитување на деца“, коментира за ЦИВИЛ, психијатарот д-р Пирганоски.
Граѓани на социјалните мрежи најавија дека ќе потпишат петиција, со која ќе бараат надлежните да ја повикаат на одговорност наставничката -крстоносец.
Моника Талеска
